Lajme flash
Meloni: Besnikë ndaj SHBA-së, por pa nënshtrim
2 Maj 2025, 15:36 / BOTA
Ne jemi të vendosur të mbrojmë interesat tona, në vazhdën e miqësisë tradicionale që na lidh me Shtetet e Bashkuara, me besnikëri, por pa nënshtrim, deklaroi kryeministrja italiane, Giorgia Meloni në një intervistë për AdnKronos, ku shpjegoi, ndër të tjera, se kishte qenë “shumë herë objekt i sulmeve të turpshme seksiste, në heshtjen dhe indiferencën e atyre që flasin kaq shumë për të drejtat e grave”.
”Do të thoja se jam mësuar tashmë, por nuk dua ta them këtë, sepse nuk duhet të mësohesh me gjëra të tilla. Jo për mua, por për shkak se nuk është e drejtë, nuk është e pranueshme, nuk duhet t’i dorëzohemi këtij barbarizmi”, theksoi ajo.
”Fryti i fundit i këtyre marrëdhënieve të mira me Trumpin është për shembull njoftimi i presidentit amerikan se dëshiron të rivendosë Ditën e Kolombit, një festë kaq e dashur për komunitetin italo-amerikan, i cili vitet e fundit ka pësuar një sulm të turpshëm ideologjik në emër të kulturës së mohimit. Në emër të italianëve, e falënderoj presidentin e Shteteve të Bashkuara për këtë zgjedhje”, deklaroi Meloni.
Meloni më pas e përcaktoi marrëdhënien me presidenten e Komisionit Evropian, Ursula von der Leyen, si “një bashkëpunim i konsoliduar dhe një marrëdhënie respekti e frymëzuar nga zgjidhja e problemeve dhe gjithashtu nga sinqeriteti maksimal”.
“Kur kemi pasur vizione të ndryshme, siç ndodhi së fundmi kur mbështeta fuqimisht që investimet në mbrojtjen evropiane të mos kufizohen vetëm në çështjen e armëve, por të adresojnë sigurinë e qytetarëve në të gjitha aspektet e saj, ne i kemi pohuar ato me rezultate të mira. Kjo është ajo që përpiqem të bëj me të gjithë bashkëbiseduesit ndërkombëtarë. Tani besoj se duhet të bëjmë një hap përpara në rimodelimin e Marrëveshjes së Gjelbër, në mënyrë që ajo të mos përfaqësojë më një barrë për konkurrueshmërinë e kompanive tona. Çështje që dolën gjithashtu në kongresin e PPE-së dhe mbi të cilat duhet të punojmë shpejt”, tha ajo.
Lidhur me marrëdhënien me presidentin e Francës, Emmanuel Macron, ajo tha se “ne përfaqësojmë dy kombe të mëdha evropiane, miq dhe fqinjë, me shumë interesa të përbashkëta, por edhe konkurrencë të shëndetshme në shumë sektorë. Ne gjithashtu përfaqësojmë dy familje politike që kanë ndjeshmëri të ndryshme kulturore. Marrëdhëniet tona janë rezultat i të gjitha këtyre nuancave, por edhe i një zakoni që na çon të bashkëpunojmë në shumë dosje. Siç ndoshta e keni kuptuar, unë kam një qasje shumë pragmatike në marrëdhëniet ndërkombëtare, shikoj rezultate konkrete dhe në disa fusha, Italia dhe Franca janë aleate”.
Ndër të tjera, Meloni shprehu zhgënjimin e saj për faktin se vitet e fundit, me qëllim që ta sulmojnë atë dhe qeverinë italiane, disa njerëz të paskrupullt nuk kanë pasur asnjë ndrojtje për përfshirjen e familjes së saj, motrës së saj, babait të vajzës së saj, madje edhe vajzës së saj.
”Pothuajse gjithmonë pa arsye, në një strategji banale të vrasjes së karakterit”, tha Meloni.
E djathta mes pasqyrës së Berishës dhe Bashës!
Nga Ermal Peçi!
ide
Kolapsi moral dhe politik i PD-së
Nga Blendi Kajsiu
Nuk mund të serviret më si premtim, ajo ç’ka përbën detyrim
Nga Mimoza Çelçima
Ne dhe Sali Kulla
Nga Edison Ypi
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128