Lajme flash
“Një grup ‘grenzash agresive’ prishi rregullat demokratike në PD”/ Berisha e përjashtoi, por çfarë përmbante platforma e Vladimir Mulajt, kandidat për kreun e PD
9 Maj 2026, 15:05 / POLITIKË
Zgjedhjet në PD për postin e kryetarit ngjallën mjaft reagime për faktin e përjashtimit të kandidatëve rivalë nga gara. Strukturat e PD-së i mohuan të drejtën e kandidimit, Ervin Salianjit, Mereme Selës dhe Vladimir Mulajt.
Kandidatët rivalë u sulmuan nga përkrahësit e Berishës dhe vete kreu aktual i PD, ndërkohë që njëri prej tyre, Vladimir Mulaj, pretendon se zëri i tij nuk është dëgjuar, edhe pse është ndër themeluesit dhe kontribuuesit e hershëm të PD-së.
Në platformën e dorëzuar në PD më 30 prill 2026 nga Vladimir Mulaj për drejtimin e Partisë Demokratike të Shqipërisë, ai premton reformim të thellë të selisë blu, rikthim të pushtetit tek anëtarësia dhe ndryshim të mënyrës së funksionimit të strukturave drejtuese.
Vladimir Mulaj e nis platformën me citimin e Martin Luther King: “Koha është gjithmonë e duhur për të bërë atë çfarë është e duhur”, ndërsa thekson se kandidimi i tij vjen pas “një beteje të gjatë morale, njerëzore dhe ligjore”. Ai kujton angazhimin e tij si student i Dhjetorit ’90 dhe mbështetjen për Sali Berishën në fillimet e pluralizmit politik në Shqipëri. “Jam i pari student i Dhjetorit që kam kërkuar mbështetjen e profesorit dhe intelektualit të shquar z. Sali Berisha”, shkruan Mulaj.
“Pas ardhjes se Profesorit Berisha, ne mbështetje dhe drejtimin tone, unë vetëm kam kontribuar dhe pa menduar asgjë me shume, pasi i isha i lumtur qe erdhi liria, erdhi demokracia dhe se dyti ndihesha i përfaqësuar me se miri nga Zoti Berisha. Me kete mendim dhe veprim kam vazhduar jeten, dhe punen time deri ne vitin 1997, ku jam thirrur për te mbështetur PDSH, si jurist dhe me vone si drejtues i Departamentit te Ligjeve te kësaj Partie, deri ne vitin 2003. Kam qene edhe sekretar i komisionit disiplinore te PDSH-se.
Kam qene edhe nen kryetar i Forumit per te Drejtat e Njeriut ne PDSH, ku kryetar ka qene I ndjeri Zoti. Pjeter Arbnori. Ne, nen drejtimin i Z. Sali Berisha, megjithse ne një periudhe shume te vështire per Partine Demokratike por edhe per kombin tone, me pune te madhe, përkushtim dhe dinjitet arritem te ngrinim menjehere moralin dhe shpirtin e demokrateve, te cilet padrejtesisht ishim rrezuar nga pushteti me dhune, me arme, me metoda komuniste, te Partise Socialiste qe sot eshte ne pushtet. Ne atehere ristrukturuam Partine Demokratike, nga ana formale dhe ne permbajtje, ribeme statutin sipas CDU, krijuam departamentet sipas degeve, gjithnje nen drejtimin e Kryetarit Z. Berisha”, thekson ai ne platformën e dorëzuar ne PD.
KRITIKAT
Në platformë, Vladimir Mulaj kritikon mënyrën sesi, sipas tij, është administruar Partia Demokratike ndër vite, duke folur për një “grup të vogël ‘grenzash agresive’” që, sipas tij, “po cenonin rëndë demokratizimin e partisë”.
“Nga fundi i vitit 2003, vura re që një grup i vogël ‘grenzash agresive’, të djallëzuara dhe aspak me kulturë demokratike, po prishnin rregullat e lojës demokratike të partisë, po prishnin dhe po cenonin rëndë demokratizimin e partisë, duke vështirësuar dhe penguar jashtëzakonisht shumë ardhjen e PDSH-së, në atë kohë në pushtet. Ky grup ‘grenzash’, që kishte për qëllim vetëm përfitimet e tyre personale, në të gjitha fushat, nuk pyeste për asgjë, nuk pyeste as për ardhjen e PDSH-së në pushtet. Në këto kushte, unë së bashku me disa mbështetës, demokratë, të cilët i përshëndes, megjithëse në kushte të vështira të lirisë së fjalës, krijuam të parin fraksion në PDSH, ku kërkuam që zgjedhjet brenda partisë të bëhen sipas parimit një anëtar, një votë, të futet mendimi ndryshe, të ketë konkurrencë të ndershme në zgjedhjet brenda partisë”, thuhet në platformën e tij.
Vladimir Mulaj deklaron se synon legalizimin e fraksioneve në parti dhe garantimin e mendimit ndryshe. “Do të legalizohen realisht, njëherë e mirë, fraksionet në parti, si struktura bashkimi dhe zgjerimi”, thuhet në platformë.
“Gjatë 8 viteve në pushtet, 2005-2013, unë megjithëse kisha gjithë këtë investim, nuk jam thirrur kurrë nga lidershipi i partisë, por jam trajtuar sikur nuk kam ekzistuar. Nuk pyeti njeri për mua, për familjen time, ku po punon, ku po jeton, ku të punon gruaja dhe si po i ushqen fëmijët. Sot familja ime e madhe nuk ka dhe nuk ka pasur asnjë anëtar të punësuar në qeverinë e PDSH-së dhe as të PS-së.
Falë Zotit dhe mundit tonë, jetojmë mirë. U morën nga rrugët pa asnjë kontribut dhe u bënë ministra, drejtorë dhe drejtues të lartë të qeverisë, ndërsa unë, edhe pse kisha kontribuar pa fund, nuk u thirra dhe nuk u pyeta asnjëherë: Çfarë mund të punoni? Çfarë mund të bëni? Me çfarë mund t’ju ndihmojmë?
Pra, lidershipi i PDSH-së nuk pyeti për mua, dhe jo më të pyesë për anëtarët dhe militantët e thjeshtë të saj. Ministrat (pjesa më e madhe), zyrtarët kryesorë u shkëputën nga hallet konkrete dhe reale të demokratëve, duke menduar me parimin që: jam unë në rregull, edhe demokratët janë në rregull. Kjo sjellje e tyre, si me mua, është bërë edhe me ju, dhe kjo sjellje e ka çuar Partinë Demokratike në këtë ditë”, shprehet Mulaj.
“Duhet të jem garant i Kartës për të Drejtat e Njeriut, për lirinë ekonomike sipas ligjeve të tregut. Do të garantoj lirinë e fjalës dhe të mendimit ndryshe. Në rast se unë fitoj, garantoj se kjo do të legjitimohet dhe respektohet menjëherë. Mendoj dhe garantoj që do të legalizohen realisht, njëherë e mirë, fraksionet në parti, si struktura bashkimi dhe zgjerimi. Do të krijojmë një kamp dhe strukturë më të gjerë të partive të djathta dhe të qendrës, me qëllim që, duke bashkëpunuar me to, ne të rrisim mbështetjen e elektoratit të djathtë dhe të qendrës.
Duhet të mbështeten këto subjekte të spektrit të djathtë edhe për demokratizimin e tyre dhe rritjen e cilësisë së lidershipit të tyre, duke i trajtuar si partnerë natyralë dhe me bashkëpunim të sinqertë e produktiv, duke e përmirësuar më shumë eficiencën elektorale tonën dhe jo siç është bërë deri tani, ku janë mbështetur dhe ndihmuar në seleksionimin e liderëve të këtyre subjekteve në mënyrë artificiale, çka ka bërë që shumica e tyre të jenë kthyer pothuajse në partnerë inekzistentë”.
Një nga pikat kryesore të programit të tij është aplikimi i parimit “një anëtar, një votë” në të gjitha nivelet e Partisë Demokratike. “Nuk do të kemi më emërime nga qendra, në bazë të rekomandimeve, njohjeve apo miqësisë”, shkruan Mulaj, ndërsa shton se edhe deputetët duhet të zgjidhen nga baza dhe jo përmes listave të mbyllura. Ai thekson se “është më e vështirë të manipulohen 100 mijë anëtarë sesa 700 delegatë”. Në platformë parashikohet edhe kufizimi i kompetencave të kryetarit të partisë.
“Kryetari i Partise Demokratike per here te pare, nuk do te kete asnje kopetence pervec perfaqesimit te partise me te tretet dhe mbikeqyres te programeve dhe statutit te saj.(i gjithe pushteti do ti kaloje strukturave) Deputetet dhe cdo drejtues do te zgjidhet vetem nga strukturat drejtuese ne rrethe . Pra stuktura me e vogel e partise do te jete me respektura dhe me e fuqishmja. Do te percaktoj se nese humbas zgjedhjet palamentare do te jap doreheqje te menjehershme, duke u kthyer ne menyre automatike ne nje anetare i thjeshte dhe pa te drejte rikandidimi per mandatin e rradhes, duke mbajtur nje qendrim absolut neutral. Do te rrisim dhe te ndryshojme aksionin qytetare ne shkalle vendi ne mbrojtje te vlerave qytetare dhe kombetare”, thuhet nw platformwn e Vladimir Mulajt.
Mulaj premton gjithashtu bashkimin e demokratëve dhe afrimin e figurave të larguara nga PD. “Nëse unë fitoj besimin tuaj, menjëherë do të bashkoj të gjithë demokratët e Shqipërisë, partitë e djathta, fraksionet dhe individët hatërmbetur”.
Në planin ekonomik, kandidati për kreun e PD premton “taksat më të ulëta në Europë”, ndërsa shton se nafta dhe energjia “do të bëhen me çmimin barazi me koston”. Sa i përket reformës në drejtësi dhe sistemit zgjedhor, Mulaj propozon që krimet zgjedhore të dënohen me jo më pak se 15 vite burg dhe të konsiderohen “krime kundër sigurisë kombëtare dhe rendit kushtetues”.
Ai kërkon gjithashtu ndryshim të sistemit zgjedhor në “mazhoritar të pastër ose proporcional kombëtar me lista të hapura”. Në fund të platformës së tij, Mulaj deklaron se “Partia Demokratike duhet të çlirohet nga frika e ndryshimit”, duke e cilësuar reformimin e partisë si të domosdoshëm “për hir të Shqipërisë”.
“Deshiroj dhe kam besim qe konkurrenca do te jete demokratike, e ndershme, e barabarte dhe e moralshme. Nese do te jete keshtu gara, atehere nuk ka rendesi se kush fiton prej nesh, ju garantoj qe do te fitoje Partia Demokratike e Shqiperise. Nese do te jete e kunderta large qofte, atehere rruga jone per te ardhe ne pushtet do te jete e gjate dhe e veshtire, por une perseri do te jem ne te njetin pozicion. Partia Demokratike duhet te çlirohet nga frika e ndryshimit !Kete duhet ta beje per hire te Shqipërisë”, thekson ai.
PLATFORMA E PLOTE NE VLADIMIR MULAJT
Po ndodh...
Sali Llapa
Nga Bato Kosova
ide
Republika e Hajdutëve!
Nga Gjergji Nika
Shqipëria, kjo anije e ngecur në zejen e vjedhjes!
Nga Edison Ypi
top
receta Alfa
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128