Lajme flash
Terrori në Modena, zbardhet profili i autorit, ishte i diplomuar për ekonomi dhe mertte trajtim psikiatrik, ja bilanci i të plagosurve
16 Maj 2026, 23:06 / BOTA
Janë zbardhur detaje të reja tronditëse rreth sulmit të përgjakshëm që ndodhi pasditen e sotme në qendër të Modenës, në “Via Emilia Centro”. Autoriteti Lokal Shëndetësor (AUSL) dhe forcat e rendit kanë saktësuar dinamikën e ngjarjes, profilin e shoferit si dhe gjendjen shëndetësore të qytetarëve të lënduar. Nga të dhënat e fundit konfirmohet se ngjarja ka lënë të plagosur tetë persona, mes të cilëve disa në gjendje kritike për jetën, ndërsa akti ka ngritur në peshë edhe reagimet më të larta politike në Itali.
Kush është autori? Përjashtohet alkooli, ishte në trajtim psikiatrik
Shoferi që shkaktoi masakrën duke u futur mbi trotuar me një “Citroen C3” me një shpejtësi që sipas dëshmitarëve i kalonte 100 km në orë, është identifikuar si Salim Elkoudri, 31 vjeç. Ai është shtetas italian me origjinë marokene, i lindur në provincën e Bergamos, por me banim në zonën e Modenës dhe pa precedentë penalë.
Pavarësisht dyshimeve të para të dëshmitarëve, analizat kanë konfirmuar se 31-vjeçari, i diplomuar për Ekonomi, nuk ka qenë nën ndikimin e drogës apo të alkoolit. Megjithatë, burimet zyrtare bëjnë me dije se ai i ishte nënshtruar më parë trajtimit psikiatrik.
Detaje rrëqethëse nga vendngjarja dhe bilanci i spitalit
Sipas deklaratës së Kryetarit të Bashkisë së Modenës, Massimo Mezzetti, makina ka goditur trotuarin duke marrë përpara fillimisht një biçikletë e më pas këmbësorët. Fatmirësisht nuk ka pasur viktima, por bilanci mjekësor mbetet dramatik me tetë të plagosur (pesë gra dhe tre burra), katër prej të cilëve në gjendje të rëndë.
Detaji më i rëndë ka dalë nga dëshmia e Luca Signorelli-t, qytetarit që u vu në ndjekje të autorit. Signorelli, me kokën ende të mbuluar nga gjaku, tregoi se si një prej grave të goditura kishte pësuar amputim të dy këmbëve gjatë përplasjes:
“Ndërsa po përpiqesha ta ndihmoja gruan me këmbët e amputuara, shoferi iku me vrap. Kështu që e ndoqa dhe ndërkohë, katër ose pesë persona të tjerë më ndoqën. Ai u zhduk pas një grumbulli makinash dhe pastaj doli me një thikë në dorë. Ai po murmuriste diçka, por nuk ishte italisht.”
Autori u përpoq të qëllonte me thikë qytetarët që po e ndiqnin, por u neutralizua falë guximit të tyre përpara se t’u dorëzohej forcave të rendit. Kryebashkiaku Mezzetti i falënderoi publikisht këta qytetarë për ndjenjën e lartë qytetare në këtë moment dramatik.
Sipas përditësimit nga spitalet:
Spitali Maggiore (Bolonjë): Një grua 55-vjeçare (e cila humbi gjymtyrët) dhe një burrë 52-vjeçar ndodhen në gjendje kritike në kujdes intensiv, të transportuar me helikopter.
Spitali Baggiovara (Modena): Një grua 53-vjeçare dhe një burrë 69-vjeçar janë shtruar në gjendje të rëndë, ndërsa një tjetër burrë 69-vjeçar është në gjendje më të stabilizuar.
Poliklinika e Modenës: Tre të lënduar të tjerë (të moshave 27, 47 dhe 71 vjeç) po trajtohen jashtë rrezikut për jetën.
Reagimet e Meloni-t dhe Salvini-t
Ngjarja ka sjellë reagimin e menjëhershëm të krerëve të shtetit italian. Kryeministrja Giorgia Meloni u shpreh përmes rrjeteve sociale:
“Ajo që ndodhi sot në Modena është jashtëzakonisht serioze. Shpreh ngushëllimet e mia për të lënduarit dhe familjet e tyre. Falënderoj qytetarët që ndërhynë me guxim për të ndaluar autorin dhe policinë për ndërhyrjen e tyre. Besoj se autori i krimit do të mbahet plotësisht përgjegjës për veprimet e tij.”
Nga ana tjetër, zëvendëskryeministri dhe kreu i Lega-s, Matteo Salvini, mbajti një qëndrim më të ashpër:
“Salim El Koudri. Ky është emri i kriminelit të ‘gjeneratës së dytë’ i cili sot në Modena vrau kalimtarë të pafajshëm me makinën e tij që ecte me shpejtësi. I ndaluar nga qytetarë të guximshëm pavarësisht se kishte një thikë, ai u arrestua. Nuk mund të ketë asnjë justifikim për një krim kaq të shëmtuar.”
Zona e Via Emilia Centro mbetet e rrethuar me shiritë të sigurisë ku po operojnë Karabinierët, Policia dhe Guardia di Finanza. Hetimet vazhdojnë në stacionin e policisë ku autori po merret në pyetje për të përcaktuar nëse bëhet fjalë për një sulm të qëllimshëm apo për një akt të shtyrë nga kriza e tij psikiatrike.
Po ndodh...
Të shtunën molotov, të enjten pazar!
Nga Bato Kosova
ide
Përse të gjithë duan të dinë, ku është dhe çfarë bën Basha?!
Nga Ermal Peçi
Problemet e Lulzim Bashës dhe ato të Taulant Ballës
Nga Sindi Hasanaj
top
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128