Lajme flash
BE-ja vendos vitin 2027 si afatin përfundimtar për ndalimin e importeve të energjisë ruse
6 Maj 2025, 20:41 / BOTA
Bashkimi Evropian ka paraqitur një strategji të re energjetike që synon t’i japë fund të gjitha importeve të naftës, gazit dhe materialeve bërthamore nga Rusia deri në fund të vitit 2027. Plani ambicioz, i propozuar nga Komisioni Evropian, parashikon një ndërprerje graduale të varësisë energjetike nga Moska, e cila vijon të mbetet një burim i rëndësishëm të ardhurash për Kremlinin, pavarësisht luftës në Ukrainë.
Sipas udhërrëfyesit të paraqitur të martën pasdite në Bruksel, ndalimi do të ndodhë në dy faza: së pari, me pezullimin e kontratave të reja deri në fund të vitit 2025; më pas, përfundimi i kontratave afatgjata – që përfaqësojnë rreth dy të tretat e importeve aktuale – deri në fund të vitit 2027. Strategjia përfshin gjithashtu ndalimin e importeve të uraniumit rus dhe kufizime për flotën “në hije” që transporton fshehurazi naftën e Moskës.
Çdo shtet anëtar i BE-së do të detyrohet të përgatisë një plan kombëtar për mënyrën se si do të eliminojë energjinë ruse nga përzierja e vet energjetike. Pavarësisht se propozimi nuk është ende ligj, Brukseli shpreson që ai të marrë formën e një kuadri legjislativ së shpejti, ndonëse zvarritja e tij deri tani ka qenë e lidhur me paqartësitë rreth nismave të presidentit amerikan Donald Trump për negociata paqeje mes Kievit dhe Moskës.
“Edhe nëse do të kishte paqe nesër, nuk do të ishte e arsyeshme që ne të bëheshim përsëri të varur nga karburanti rus,” deklaroi Komisioneri Evropian për Energjinë, Dan Jørgensen. Ai theksoi se Presidenti Putin ka treguar gatishmërinë për të përdorur gazin si armë dhe se BE-ja nuk duhet të rrezikojë përsëri një varësi të tillë strategjike.
Në vitin 2024, vendet e BE-së shpenzuan rreth 23 miliardë euro për karburante fosile ruse, një shumë që tejkalon ndihmën ushtarake të dhënë për Ukrainën. Aktualisht, ndërsa tubacionet NordStream dhe Yamal janë jashtë funksionit, TurkStream mbetet korridori i vetëm aktiv për gazin rus që hyn në Evropë, ndërsa importet e LNG-së ruse në terminalet franceze, spanjolle dhe belge kanë shënuar rritje me 9% vitin e kaluar.
Plani parashikon gjithashtu mbrojtje ligjore për kompanitë evropiane që do të detyrohen të ndërpresin kontratat me furnizuesit rusë, duke i lejuar ato të thirrin “forcën madhore”. Megjithatë, kjo mund të përballet me kundërshtime ligjore dhe arbitrazhe të kushtueshme, pasi shumë kontrata përmbajnë klauzola “merr ose paguaj”.
Megjithë ndarjet mes vendeve si Hungaria dhe Sllovakia që kërkojnë përjashtime për shkak të varësisë së lartë, Komisioni është i vendosur të vazhdojë me shumicë të kualifikuar për të shmangur bllokimet. Në sfond, negociatat mes Brukselit dhe administratës Trump po intensifikohen, me qëllimin që të zëvendësohet gazi rus me LNG të prodhuar në SHBA.
Strategjia e re konsiderohet një hap vendimtar për shkëputjen e plotë të BE-së nga energjia ruse dhe për mbylljen e një kapitulli që ka ndikuar thellësisht në sigurinë energjetike dhe politike të kontinentit.
Po ndodh...
E djathta mes pasqyrës së Berishës dhe Bashës!
Nga Ermal Peçi!
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128