Lajme flash
Gruaja e Bruce Willis zbulon si aktori i prekur nga demenca po jeton larg saj dhe dy vajzave të vogla: Ishte vendimi më i vështirë që kam marrë ndonjëherë
29 Gusht 2025, 19:11 / SHOWBIZ
Në një rrëfim tronditës, gruaja e Bruce Willis, Emma Heming Willis, zbuloi vendimin më të vështirë që iu desh të merrte për të mirën e bashkëshortit të saj dhe dy fëmijëve të tyre të vegjël, ndërsa aktori i famshëm vazhdon të përballet me Demencën Frontotemporale (FTD).
Protagonisti 70-vjeçar i serisë legjendare të filmave Die Hard, u diagnostikua në vitin 2023 me këtë formë të demencës, e cila prek gradualisht zonat e trurit që lidhen me personalitetin dhe të folurit.
Në një emision special të ABC-së të titulluar “Emma dhe Bruce Willis: Udhëtimi i papritur”, 47-vjeçarja Emma foli rreth vendimit për ta zhvendosur Bruce-in në një shtëpi të dytë, larg saj dhe vajzave të tyre, 13-vjeçares Mabel dhe 11-vjeçares Evelyn.
“Ishte vendimi më i vështirë që kam marrë ndonjëherë,” tha ajo. “Bruce do të donte që vajzat tona të ishin në një shtëpi që i plotësonte më së miri nevojat e tyre, jo të tijat.”
Willis tani jeton në një shtëpi në katin përdhes, të projektuar posaçërisht për gjendjen e tij, me një ekip të plotë kujdestarësh që plotësojnë nevojat e tij dhe kujdesen për të 24 orë në ditë.
Emma theksoi se vajzat e tyre e vizitojnë shpesh babanë e tyre dhe kalojnë momente të përditshme së bashku, si mëngjesi ose darka, duke krijuar momente dashurie dhe lidhjeje.
“Kur shkojmë atje, zakonisht jemi në kopsht ose po shikojmë një film… Ka të bëjë thjesht me të qenit i pranishëm, me lidhjen me Bruce-in. Shtëpia është plot dashuri, ngrohtësi, kujdes dhe të qeshura. Është prekëse të shohësh se sa shumë miq të Bruce-it vazhdojnë të jenë pranë tij, duke i sjellë jetë dhe gëzim jetës së tij të përditshme”, tregoi ajo.
Gjatë intervistës, kur gazetarja e pyeti se çfarë do të donte t’i kërkonte burrit të saj nëse do të mund të zhvillonte një bisedë të vërtetë me të sot, Emma u përgjigj: “Do ta pyesja nëse është mirë. Nëse ka frikë. Nëse është i shqetësuar. Do të doja shumë të dija se çfarë ndien dhe si mund ta mbështes më së miri.”
Bruce Willis ka gjithashtu tre vajza të rritura nga martesa e tij me Demi Moore, Rumer 37-vjeçare, Scout 34-vjeçare dhe Tallulah 31-vjeçare.
Kur diagnoza e FTD-së u konfirmua nëpërmjet imazherisë së trurit, Emma kujton se u ndje e panikuar. “Ishte diçka që as nuk mund ta shqiptoja. Kur e dëgjova, ngriva. Nuk mund të dëgjoja asgjë tjetër. Ishte sikur po bija në një boshllëk”, tha ajo.
E pyetur nëse mendonte se Bruce e kuptonte çfarë po i ndodhte, ajo u përgjigj: “Nuk mendoj se ai i bashkoi copat”.
Emma i është përkushtuar plotësisht kujdesit për Bruce-in dhe ka shkruar një libër për përvojën e saj të quajtur “Udhëtimi i papritur”, i cili do të dalë në shitje më 9 shtator.
Pavarësisht formës së avancuar të sëmundjes, ajo vëren: “Bruce është ende shumë i lëvizshëm. Shëndeti i tij i përgjithshëm është i mirë. Është vetëm truri i tij që po e zbulon.” Ndërsa ylli i “The Sixth Sense” humbet aftësinë për të komunikuar verbalisht, familja ka zhvilluar mënyra të reja për t’u lidhur.
“Kemi gjetur një mënyrë tjetër për të komunikuar. Dhe jam mirënjohëse. Jam mirënjohëse që im shoq është ende këtu, në mënyrën e tij”, u shpreh Emma.
Emma kujton se shenjat e para të demencës ishin delikate, por shqetësuese.
“Ai ishte gjithmonë një person shumë i folur, shumë i pranishëm. Papritmas filloi të bëhej më i qetë. Kur familja mblidhej, ishte sikur ‘fikej’.” Pak më vonë, ai filloi të harronte fjalët dhe belbëzimi që kishte si fëmijë u rishfaq”, tregoi ajo.
FTD është një formë e demencës që prek kryesisht sjelljen, personalitetin dhe të folurit. Ndryshe nga sëmundja e Alzheimerit, ajo nuk fillon me humbjen e kujtesës, por me ndryshime në karakter dhe sjellje sociale.
Ajo përbën rreth 5% të rasteve të demencës, me 50,000 deri në 60,000 raste të diagnostikuara në SHBA, krahasuar me 6 milionë që vuajnë nga sëmundja e Alzheimerit.
Po ndodh...
Pushteti që nuk lëshohet kurrë
Nga Namir Lapardhaja
ide
top
receta Alfa
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128